Urwego rushinzwe gucunga umutekano wa perezida n’abandi bategetsi bakuru muri Leta Zunze Ubumwe z’Amerika (Secret Service) rwatangaje ko umugabo witwaje imbunda yarashwe nyuma yo gushaka kwinjira mu nkengero z’inzu ya Perezida Donald Trump iri i Mar-a-Lago muri leta ya Florida.
Abategetsi bavuze ko uyu mugabo ucyekwa yari afite imbunda nto n’akajerikani karimo ibikomoka kuri peteroli ubwo yabonwaga ku muryango wo mu majyaruguru w’urwo rugo.
Byabaye ku mugoroba wo ku cyumweru ubwo Perezida Trump yari ari i Washington DC.
Igitangazamakuru CBS gikorana na BBC muri Amerika cyatangaje ko cyabwiwe n’abantu benshi ko uwo ucyekwa ari Austin T. Martin, wari ufite imyaka 21, w’i Cameron, muri leta ya North Carolina.
Ibiro bya polisi ishinzwe umutekano muri ako gace aho inzu ya Trump y’i Mar-a-Lago iri, byahaye itangazo BBC bivuga ko umuryango we wari watangaje mbere yaho ku cyumweru ko yaburiwe irengero.
