Uwahoze ari Perezida wa Repubulika Iharanira Demokarasi ya Congo, Joseph Kabila Kabange, yashinze ihuriro ryitwa Front pour la refondation de la Nation (FRN), rigamije impinduramatwara mu gihugu nyuma y’igihe kimaze mu bibazo nk’uko aherutse kuvuga ko hakenewe impinduka zo gutabara Igihugu mu buryo bwihutirwa.

Joseph Kabila, wayoboye Repubulika Iharanira Demokarasi ya Congo kuva mu 2001 kugeza mu 2019, niwe muyobozi w’iri huriro mu gihe abandi bari kuri uru rutonde harimo Bertrand Bisimwa wagizwe Visi Perezida wa mbere n’aho Corneille Nangaa agirwa Visi Perezida wa kabiri.

Major General, Sultani Makenga uyoboye ubuyobozi bwa gisirikare bwa AFC/M23, yagizwe Umugaba Mukuru w’Ingabo, ariko kandi akagira umwanya wa Visi Perezida.

Abandi bagaragajwe mu buyobozi bw’iri huriro harimo Prof. Dr. Freddy Kaniki, wagizwe Umunyamabanga Mukuru; Benjamin Mbonimpa, agirwa Umunyamabanga Mukuru Wungirije na Désiré Rukomera, wagizwe Umunyamabanga Uhoraho wiri huriro.