Umuyobozi mukuru w’ingabo za Uganda, Muhoozi Kainerugaba, akaba n’umuhungu wa Perezida Yoweri Museveni umaze igihe kirekire ku butegetsi, yatangaje ko azahatana ku mwanya wa Perezida mu mwaka wa 2031.
Kainerugaba, ufite imyaka 52, amaze igihe avugwa nk’ushobora kuzasimbura se ugeze mu zabukuru, akaba azwi cyane ku bw’ubutumwa bukaze akunze gushyira ku mbuga nkoranyambaga, harimo n’ubwo yavuze ko azaca umutwe Bobi Wine, umuyobozi mukuru utavuga rumwe n’ubutegetsi.
Yagize uruhare rukomeye mu gutuma se yongera gutorwa mu matora aheruka yabaye muri Mutarama 2026 aho yategetse ko hakoreshwa ingufu mu guhangana n’abatavuga rumwe n’ubutegetsi ndetse no gufunga interineti.
“Nzahatana ku mwanya ukomeye kurusha iyindi mu gihugu mu 2031. Kandi tuzatsinda ku bw’ubuntu bw’Imana Ishoborabyose,” ibi Kainerugaba yabivuze mu butumwa bwinshi yashyize ku rubuga rwa X mu ijoro ryo ku wa Kabiri.
“Mfashijwe na data, Mzee, nzabona amajwi 90% mu matora yo mu 2031,” ni ko yongeyeho, akoresha ijambo ry’icyubahiro kuri se w’imyaka 81 y’amavuko.
Kainerugaba, uyobora itsinda riharanira impinduka za politiki ryitwa Patriotic League of Uganda, yari yarigeze gutangaza ko azahatana mu matora aheruka yo muri Mutarama ariko amaherezo aza kubireka.
Museveni, uyobora ishyaka riri ku butegetsi rya National Resistance Movement (NRM), amaze kuyobora Uganda kuva mu 1986, kandi abamunenga bashinja guverinoma ye guhutaza uburenganzira bwa muntu mu buryo butandukanye, harimo iyicarubozo, gushimuta abantu no kubafunga nta mpamvu yumvikana. Guverinoma ihakana ibyo birego.
Umuyobozi mukuru utavuga rumwe n’ubutegetsi, Bobi Wine, yahungiye muri Leta Zunze Ubumwe za Amerika mu ntangiriro z’uyu mwaka, avuga ko yatinyaga ko ubuzima bwe bwashyirwa mu kaga.
Undi muntu ukomeye utavuga rumwe n’ubutegetsi, Kizza Besigye, amaze igihe afunze kuva mu 2024 kandi akaba akurikiranweho icyaha cyo kugambanira igihugu.
Ubwo yabazwaga niba Museveni azashaka indi manda, umuvugizi wa guverinoma Alan Kasujja yabwiye ibiro ntamakuru bya Reuters ati: “Nk’uko byagiye bigenda mu myaka ishize, Perezida Museveni n’ishyaka ayobora bazafata icyo cyemezo igihe nikigera.”
