Komisiyo y’Igihugu y’Amatora (NEC) yakiriye kandidatire ya Paul Kagame nk’umukandida w’Umuryango FPR-Inkotanyi.
Paul Kagame yashyikirije Oda Gasinzigwa uyobora NEC, impapuro zimwemerera guhagararira FPR Inkotanyi nk’umukandida
Perezida Kagame yatowe na FPR-Inkotanyi ku itariki ya 09 Werurwe 2024 nk’umukandida uzahagararira uwo mutwe wa politiki mu matora y’Umukuru w’Igihugu ateganyijwe muri Nyakanga 2024.
Nyuma yaho indi mitwe ya politiki itandukanye irimo PSD, PL, PDI, PPC, PSP, PSR na UDPR, na yo yagaragaje ko ishyigikiye Perezida Kagame, ikaba yaramutanzeho umukandida mu matora ateganyijwe muri uyu mwaka.
Perezida Kagame yayoboye Manda ya mbere kuva muri 2003-2010 ubwo yari amaze gutorwa mu matora rusange yabaye muri 2003, nyuma yaho aza kongera gutorerwa manda ya kabiri kuva muri 2010-2017.
Muri 2015 (habura imyaka 2 ngo Manda ya kabiri irangire), Abanyarwanda benshi bifuje ko Perezida Kagame yakomeza kubayobora, basaba ko Itegeko Nshinga ribanza kuvugururwa kugira ngo ribimwemerere.
Itegeko Nshinga ryaje kuvugururwa, Perezida Kagame ahatana muri 2017 n’abakandinda babiri ari bo Frank Habineza wo mu Ishyaka riharanira kurengera Ibidukikije, Democratic Green Party of Rwanda (DGPR), hamwe na Philippe Mpayimana wari umukandida wigenga.
Kuri iyi nshuro Komisiyo y’Igihugu y’Amatora(NEC) yatangaje ko hari abakandida bigenga umunani, bagaragaje ko bashaka kwiyamamariza uyu mwanya wo kuyobora u Rwanda.
