Kompanyi y’indege ya Scandinavian Airlines (SAS) yatangaje ko indege yayo byabaye ngombwa ko kuwa Gatatu tariki 18 Nzeri 2024 igwa hutihuti igasubika urugendo mu nzira nyuma y’imbeba yari ivumbutse mu biryo umugenzi wari mu ndege yari ahawe.

Iyi ndege yarimo iva mu murwa mukuru wa Norvège, Oslo, ijya i Malaga muri Esipanye, biba ngombwa ko igwa hutihuti mu mujyi wa Copenhagen muri Danemark.

Umuvugizi w’iyi kompanyi, Oystein Schmidt, yabwiye ibiro ntaramakuru by’Abafaransa, AFP, ko kugwa kw’iyo ndege kwakurikije amabwiriza ngenderwaho y’iyo kompanyi kuko iyo mbeba ikimara kuvumbuka mu biryo by’umugenzi yahise ijya kwihisha mu ndege ahantu hatagaragaraga.

Ibi byateje impungenge ku mutekano w’iyo ndege.

BBC yatangaje ko byabaye ngombwa ko abagenzi bari muri iyo ndege bahabwa indi ibageza i Malaga.

Ubusanzwe amakompanyi y’indege agendera ku mabwirizwa akomeye ajyanye n’udukoko two mu bwoko bw’imbeba n’imende twagaragara mu ndege.

Igihe tugaragaye bisaba ko dukurikiranirwa hafi mu buryo bwihuse kugira ngo tutarya insinga z’indege.