Mu mujyi wa Bujumbura w’igihugu cy’Uburundi hagaragaye ifoto imanitse ya Perezida Paul Kagame aho yatunguye abantu benshi biganjemo Abarundi.
Ni ifoto irimo gucicikana cyane ku mbuga nkoranyambaga aho Abarundi bahaye ikaze Perezida Kagame.
Amakuru yemeza ko iyi foro ijyanye n’inama ya 23 y’Abakuru b’Ibihugu bigize Umuryango w’Isoko Rusange ry’Ibihugu bya Afurika y’Iburasirazuba n’Amajyepfo (COMESA), Uburundi burimo kwitegura tariki 31 Ukwakira 2024.
Ku ruhande rw’Urwanda amakuru avuga ko Minisitiri w’Ubucuruzi n’Inganda, Sebahizi Prudence, ari we uzahagararira u Rwanda.
Mu rwego rwo guha ikaze ibihugu bigiye kwitabira iyi nama ya COMESA, amafoto y’abakuru b’ibihugu biwugize yashyizwe ku byapa hirya no hino mu mujyi wa Bujumbura.
Bosobanuye ko n’abandi bakuru b’ibihugu bigize uwo muryango, amafoto yabo ashyirwa ku byapa byo muri uwo mujyi w’ubucuruzi i Burundi.
Ni umuco ukorwa na COMESA ahantu hose hagiye kubera inama y’abakuru b’ibihugu ariko ntibisobanuye ko byanze bikunze uwo mukuru w’igihugu washyizwe ku byapa aba azitabira inama.
